Җиңеп кайтыгыз, егетләр

Ватанны саклаучыдлар елы, Бөек Җиңүнең 80 еллыгы уңаеннан “Җиңү кайтавазы” хәрби-патриотик бәйге-фестиваленең сайлап алу турлары бара.

Алар һәр авыл җирлегендә махсус хәрби операциядә катнашучыларга ярдәм йөзеннән үткәрелә. Билетлардан җыелган акча шул максатта кулланылачак.

Әлеге фестивальнең максаты – яшь буынны патриотик рухта тәрбияләү, Ватанны сагында башларын салган геройларның батырлыкларын мәңге күңеләрдә йөртү һәм яшь буынга җиткерү.

 Безгә Түбән Аты мәдәният йортында районкүләм фестиваль-бәйгенең сайлап алу турында катнашырга туры килде. Анда Түбән Аты, Урта Сәрдә, Наласа, Урта Бирәзә авыллары үзешчәннәре чыгыш ясады.

Бәйге нигезләмәсе буенча үзешчәннәрнең яше чикләнмәгән. Бу көнне дә сәхнәгә балалар да, яшьләр дә, өлкәннәр дә чыкты. Иң яшь катнашучылар Зәмирә Ихсановага (Түбән Аты), Азалия Яруллинага (Урта Сәрдә), Адель Мөхетдиновка, Сәмир Галиевка (икесе дә Урта Бирәзәдән) ун яшь булса, иң өлкәннәрдән Наилә Хәсәновага 67, Рәмзия Рәхимовага 65 (икесе дә Түбән Атыдан), Илдар Сәгъдиевка 62 (Наласа), Гөлзия Фәттаховага 55 (Урта Сәрдә) яшь.

Чыгышлар берничә төрле номинациядә барды. Җырчылар, биючеләр, нәфис сүз осталары чыгыш ясады. Спектакльләрдән өзекләр дә күрсәтелде. Түбән Аты авылы үзешчәннәре Мирсәй Әмирнең “Тормыш җыры” спектакленнән, Урта сәрдәләр Данил Салиховның “Язмыш” спектакленнән өзек тәкъдим итте. Беренчесе Бөек Ватан сугышы елларында тылдагы тормышны тасвирласа, икенчесендә сугышчы-интернаионалистлар, балаларын югалткан аналарның күз яшьләре, ирләр дуслыгы һәм Ватанны ярату искә алына. Бу – тарих, кемнеңдер сынык язмышлары, якыннарыбызның йөрәк ярасы һәм безнең уртак фаҗигабез.

Ә менә Наласа урта мәктәбенең “Наз” театраль коллективы Зилә Габдрахманова “Аларсыз кыен бит” дигән әсәрен сәхнәләштергән һәм анда бүгенге көнге вәзгыятьне бер гаилә кысасында күтәреп чыккан. Гаилә башлыгы, ананың газиз улы, хатынның кадерле ире, сабый баланың яраткан әтисе махсус хәрби операция зонасында, күптәннән хәбәрсез. Өстәвенә хатыны авырып китә. Дәвалау өчен зур суммада акча кирәк. Ана белән бала “ут” эчендә кала. Шунда изге күңелле күршесе ярдәм кулы суза. Автор монда бу хәсрәтнең дә уртак булуын, бердәмлек кенә җиңеп чыга алуын күрсәтә. Улларыбыз, ирләребез, әтиләребезнең исән-сау кайтуларын тели, аларсыз бик кыен булуын аңлатырга тырыша.

Җырлар һәм нәфис сүзләр, хәтта биюләр дә патриотик рух белән сугарылган, Балалар башкаруындагы “Тол хатыннар биюе”, “Бабаемның медальләре”, “Җиңеп кайт” шигырьләре элеккеге һәм хәзерге чорга да туры килә. “Син кайтмадың”, “Илкәем”, “Кайту” җырлары, кызганыч, бүген дә актуаль яңгырый. Иң соңыннан Дилюс Сәлахов башкарган “Җиңү көне” җыры күңелдә киләчәккә ышаныч уята.