Арча районында чәчтарашханәләр эшли башлады

“Халык йөри, клиентлар аз түгел. Шалтыратып, алдан язылып киләләр”, — ди хезмәткәрләр. Чәчтарашханәгә бару өчен электрон рөхсәт алганда, 11 дигән санга басарга кирәк. Рөхсәтне айга бер тапкыр 2 сәгатькә алырга мөмкин.

Чәчтарашханәләрдә ишекләр бикле, клиентлар шакып яки шалтыратып кына керә. Битлексез килүчеләрне кабул итмиләр. Ишектән керүгә, хезмәткәрләр клиентның тән температурасын үлчи, кулларына антисептик сиптереп эшкәрттерә. Ә клиентны озаткач, урындык—өстәлләргә, ишек тоткаларына хлорлы су белән дизенфикция ясала. Чираттагы клиентны 15-20 минуттан соң, бүлмәне җилләткәч кенә кабул итәләр.