Тумыштан сукыр коляскада хәрәкәтләнүче инвалидка армиягә чакыру җибәргәннәр

Яр Чаллы шәһәрендә яшәүче 28 яшьлек Сергей Ситдиков бүген стресс халәтендә. Тумыштан инвалид егеткә хәрби комиссариат чакыру җибәргән.

“Миңа чакыру килде, мин моңа бик аптырадым, – дип сөйләгән Сергей “Челнинские известия” газетасына. – Мин тумыштан 1 группа инвалид: күрмим, ДЦП белән интегәм, коләскада гына хәрәкәтләнәм. Хәрби комиссариатка барлык документлар мин балалар йортында яшәгәндә үк җибәрелгән иде. Тик күптән түгел башта чакыру җибәрделәр, аннан соң шалтырата башладылар. Хәзер мине  армиядән качып йөри диләр. Мин тикшерү бүлегенә барырга тиеш. Шунысы мәгълүм булды: минем шәхси эш папкам югалган. Ә тапканнан соң аның буш булуы ачыкланган. Барлык документлар һәм медицина нәтиҗәсе юкка чыккан. Ничек мондый хәл була ала?”

Гыйнварда Сергейга 28 яшь тулган, тик аңа хәрби билет бирмәгәннәр.

“Миңа урындагы күрмәүчеләр җәмгыятендә ярдәм итәргә алындылар. Инде хәрби комиссариат вәкиле белән очраштык, – ди Сергей. – Миңа барысын да ачыкларга һәм хәрби билет бирергә ышандырдылар”.