Арча районында 2026 елның иң яхшы чыгарылыш сыйныф укучысы билгеле булды

Район мәдәният йортында бүген “Сәләтле балачак – 2026” дип исемләнгән төрле дәрәҗәдәге олимпиадаларда алдынгы урыннар алган укучыларны, аларны әзерләгән укытучыларны бүләкләү тантанасы узды. Бәйрәмнең иң дулкынландыргыч мизгеле «2026 елның иң яхшы чыгарылыш сыйныф укучысы» исемен атау булды. Быел әлеге мәртәбәле исемгә Апаз урта мәктәбен тәмамлаучы Айназ Хәертдинов лаек дип табылды.

“Мин бу исемгә ирешүемә бик шат, – дип хис-кичерешләре белән уртаклашты Айназ. – Миңа һәрвакыт терәк булган әти-әниемә, миңа ныклы белем һәм тәрбия биргән укытучыларыма, мәктәбебез директоры Раушан Хәкимовичка, минем уңышларымны күреп, бәяләгән район, мәгариф идарәсе җитәкчеләренә зур рәхмәт. Киләчәктә дә тырышып укып, илебезгә, җәмгыятебезгә яхшы белгеч булырга тырышырмын”.