Арчаның беренче балалар бакчасында Яңа ел кичәсе узды

Нинди матур безнең чыршы ,

Җем-җем килеп яна ул.

Башлыйбыз чыршы бәйрәмен,

Котлы булсын Яңа ел!

Бакчабызның кечкенәләр төркеменә йөрүче балалары белән шаулатып - гөрләтеп Яңа ел кичәсе үткәрдек. Бәйрәмгә Кар кызы белән Петрушка кунакка килделәр. Кар кызы кар бөртекләре булып киенгән кызлар белән бөтерелә -бөтерелә очып биеде. Петрушка һәм Кар кызы балалар белән чыршы янында "Кар йомарламы", "Төлке һәм куяннар", "Кар көртләре" дигән күңелле хәрәкәте уеннар уйнадылар. Яшел чыршы әйләнәсендә җырлар җырладылар. Җилкәсенә зур капчыгын асып шат күңелле Кыш бабай килгәч бәйрәм тагын да ямьләнеп китте. Балалар Кыш бабайга бик матур итеп шигырьләр сөйләделәр. Ә Кыш бабай балаларга бүләкләр өләште. Бәйрәм бик матур, эчтәлекле үтте. Килгән кунаклар, әти-әниләр матур теләкләр әйтеп, шатлык һәм рәхмәт хисләрен җиткерделәр.

Зиннәтова Г.Б. Гәбделбәрова Ә.Р