Бүген - әниләр көне

Шагыйрь Әнгәм Атнабаев шигырьләрен бергәләп укыйк.
 Минем әни әнә шундый ул
Үзе кояш, 
Үзе яңгыр ява... 
Кайтып киләм туган өемә. 
Әнкәй чыккан мине каршыларга, 
“Балам кайта”,- диеп сөенә. 
 
Әле өйгә кереп җитмәгәнмен, 
Китеремне, ахры, уйлый ул: 
Кояш чыккан кебек елмая да 
Яңгыр яуган кебек елый ул, 
Минем әни әнә шундый ул.

Әнкәй, синең кулларың

Синең куллар, мине сөя-сөя, 
Бишекләргә салган куллар ул,
Соңгы телемнәрен миңа биреп, 
Үзе коры калган куллар ул,
Әнкәй, синең йомшак кулларың.
 
Синең куллар, керләремне юып, 
Тупасланып беткән куллар ул. 
Утта пешеп, салкыннарда өшеп, 
Сөялләнеп беткән куллар ул. 
Әнкәй, синең йомшак кулларың.
 
Унбиш яшьлек кызлар кулына да 
Алыштырмам синең  кулыңны. 
Шул кулларың белән тагын бер кат 
Иркәләче, әнкәй, улыңны!