Яңа Кенәрдә узган ярышта 82 яшьлек балыкчы катнашты

Узган ялларда Яңа Кенәр авылында традицион балыкчылар ярышы үткәрелде. Районкүләм уздырылган әлеге бәйрәмдә иң оста балыкчылар җыелган иде. Иң яшь балыкчы - Самат Әхмәдуллин, ә иң өлкәне 82 яшьлек Марсель Зарипов иде. Ярышта бер хатын-кыз (Гөлшат Әхмәдуллина) балыкчы да катнашты.

Балыкчылар бәйрәмен Яңа Кенәр авыл җирлеге башлыгы Әгъзәм Гайфуллин ачты. "Бүген бик матур бәйрәмгә җыелдык. Оештыручыларга, катнашучыларга зур рәхмәтемне җиткерәм. Алдагы елларда да шулай бергә җыелырга язсын, дәвамлы булсын", - диде ул.  

Әлеге ярышларны оештыруда төп көч куючылар һәм иганәчеләр - Яңа Кенәр авыл җирлегенең "Сугыш хәрәкәте" ветераннары, Гарифулла Әхмәтгалиев һәм Арча районы хакимияте. 

Балыкчыларның хезмәтен үз эшенең осталары булган жюри әгъзалары бәяләде. Иң күп балык тотучы Фәрит Самигуллин 1 урынга лаек булды.   

Балыкчыларның һәм җанатарларга ял бүләк итүче  Хәйретдинов Радик һәм Яңа Кенәр җирлеге мәдәният йорты хезмәткәрләре берсеннән-берсе матур җырларын бүләк итте. Килгән һәркем уха, чәй, коймак белән авыз итте.