Ислам – яхшылык дине

Арчаның Үзәк мәчетендә “Экстремизмга  –юк! Ислам – яхшылык дине!” дип исемләнгән акция узды.

Мәчеткә йөрүче яшь буынга, балаларга экстремизмның тискәре йогынтысы турында сөйләнде.

Арча Үзәк мәчетендә төрле чаралар оештырылып тора. Аларның күбесе балалар өчн үткәрелә. Дини бәйрәмнәрне зурлап билгеләп үтәләр. Балаларның күңелләрен күрү өчен ниләр генә эшләмиләр. Батутта сикерү, татлы мамык, тәмле сулар, тудырма, саф һавада зур казанда пешкән пылау – барысы да алар өчен. Теләге булган һәм бала әти-әнисе белән килеп күңел ача, уеннарда катнаша, үз сәләтен күрсәтә һәм сыйлана ала.

Биредә җитди темага булган әңгәмәләр, кичәләрне дә балаларны зарыктырмый, аларның игътибарын җәлеп итә торган итеп үткәрә беләләр. Шундыйларның берсе – “Экстремизмга  – юк! Ислам – яхшылык дине!” дип исемләнгән акция.

Ислам – тынычлыкка, изге эшләргә өндәүче дин. Моны балаларга үтемле итеп аңлата да белергә кирәк. Ә ничек?

– Җомга намазыннан соң шушы темага вәгазь сөйләнде. Аннан бәйрәм оештырдык. Балалар баллы тәм-томнар һәм тундырма белән сыйланды. Аларның күңелен күргән, әлеге күркәм эштә катнашкан Мифтаховлар гаиләсенә аерым рәхмәтләребезне җиткерәбез, – диде район мөхтәсибе Әмир хәзрәт Миннемуллин. – Кылган игелекләрен Аллаһ Раббым арттырып кайтарсын. Шулай ук балаларга әти-әниләргә карата яхшы мөнәсәбәттә булырга һәм Ватанны яратырга кирәклеге турында үгет-нәсыйхәт тә җиткердек.