Кенәрләр спорт ярышлары сезонын волейбол белән ачты

12 ноябрь көнне Яңа Кенәр мәктәбе спортлар залына Арча, Биектау һәм Әтнә спорт командалары җыелды. Хуҗаларның өч волейбол командасы белән бергә барлыгы алты команда үзара көч сынашты. 

Волейбол уеннарын һәм спорт ярышлары сезонын авыл җирлеге башлыгы Әгъзәм Гайфуллин ачып җибәрде. "Бирегә җыелган һәркемне сәламләп, быелгы сезонны ачык дип белдерәм. Ул быел волейбол ярышлары белән башланып китә. Алды әле безне бик күп күләмле спорт ярышлары һәм республикакүләм чаралар көтә"- диде ул үз чыгышында.

Волейбол ярышларын оештыручы Ришат Садиков, сугышчан туганлык оешмасы вәкилләре Рашат Салихҗанов һәм Таһир Шакиров командаларга уңышлар теләп, лаеклыларның җиңүенә ышануларын белдерделәр.

Алты сәгать барган кызу ярышлар түбәндәге нәтиҗә белән тәмамланды: 1 урын - Биектау, 2 урын - Әтнә, 3 урын - Яңа Кенәрнең "Кедр" командасы. 

Җиңүчеләргә медальләр һәм истәлекләр бүләкләр тапшырылды.