Күңелле очрашу

Минем оныгым Эвелина Гыйльфанова Арчаның алтынчы мәктәбендә бишенче сыйныфта укый. Дүртенче сыйныфтан соң аларга сыйныф җитәкчесе булып Гөлсирә Гыйльметдинова килде. Әле яңа гына булса да, балалар аны бик тиз үз итте. Ул да укучыларын яратты. Өлкәннәр көне уңаеннан ул әби-бабайларны кунакка чакырды.

– Оныкларны күбрәк әбиләр, бабайлар үстерә инде. Шуңа олылап сезне чакырырга булдым. Мин чаралар үткәрергә яратам. Шуңа соңгы очрашуыбыз да булмас әле, – диде Гөлсирә Вагыйзовна Өлкәннәр көне белән котлап.

Бу көнне безнең өчен балалар да чыгыш ясады, укытучы үзебезне дә тик тотмады, әби-бабайлар өчен бәйгеләр оештырды. Минем оныгым бии. Бу көнне безгә бүләк итеп укучылар күмәк татар халык биюен башкардылар, шигырьләр сөйләделәр.

Өлкәннәрне бергә җыюның икенче уңай ягы да бар  – без, әби-бабайлар, да үзара таныштык, аралаштык. Бик күңелле һәм матур кичә килеп чыкты. Рәхмәт сезгә, Гөлсирә Вагыйзовна. Авыр хезмәтегездә уңышлар телибез.

Әби-бабайлар исеменнән рәхмәт җиткереп

Фәридә Мифтахова