Районыбызның «Хәзинә» фольклор коллективы Мари иленнән җиңү яулап кайтты

Бүген Йошкар-Ола шәһәренең Татар мәдәнияте үзәгендә "Милләтләр хәзинәсе" Бөтенроссия милләтара фольклор фестиваль-бәйгесе узды. Фестивальдә Арча район Мәдәният йортының "Хәзинә" фольклор коллективы да катнашты.

Коллектив "Аулак өй" күренеше белән чыгыш ясап, 1нче дәрәҗә лауреат Дипломына лаек булды.

 Бу турыда безгә коллективның җитәкчесн Ләйлә Хәкимова хәбәр итте.

Агымдагы елның җәендә оешкан "Хәзинә" фольклор коллективында барысы 12 кеше. Коллектив әле бик яшь булуына карамастан, Арча данын яклап күп кенә фестиваль-бәйгеләрдә, илкүләм чараларда даими чыгыш ясый алар. Хәзерге вакытта алар районыбыз авыллары укучылары өчен тамашаларын тәкъдим итәләр.