Район хуҗалыклары инженерлары белән укулар уздырылды

Инженер үз урынында булган хуҗалыкларда машина-трактор паркы, гаражлар да тәртиптә, техника вакытында ремонтлана, дөрес итеп саклана. Хуҗалыкларның бөтенесендә дә инженерлар бар хәзер, бу да уңай күренеш.

Авыл хуҗалыгы һәм азык-төлек идарәсе җитәкчесе урынбасары Ленар Абдуллин инженерларның 2020 елдагы эшчәнлегенә анализ ясады. Үсеш перспективалары, машина-трактор паркын яңартуда дәүләт ярдәме, цифрлы техно-логияләр кертү турында сөйләде.

Машина-трактор паркының  торышына килсәк, хуҗалыкларда 100 гектар чәчүлек мәйданының энергия белән тәэмин ителеше – 188 ат көче. Республика буенча 172 ат көче икәнлеген исәпкә алсак, бездә хәлләр алай ук начар түгел.

Бу күрсәткеч буенча беренче урында – “Аю” ширкәте. Соңгы елларда биредә яңа техника кайтып тора.

Аннан соң “Казанка” (242), “Ак барс” агрокомплексы” (226), “Ашыт” (226) ширкәтләре.

Хәл “Төрнәле–Пошалым” ширкәтендә катлаулырак. Монда  – 127 ат көче генә. Ашлык комбайннары, тракторларның күбесе инде эшлисен эшләгән, аларны тулысынча диярлек яңартырга кирәк.

Искегә тисәң, исең китәр, дигәндәй, иске техникага запас частьлар да күбрәк тотыла. “Курса МТСы” ширкәте 2020 елда 34 млн сумлык яңа техника алган, ә запас частьларга 8 млн сумнан артыграк кына тоткан. Ә “Игенче” ширкәте узган ел яңа техника бөтенләй алмаган, аның каравы 34 млн 897 сумлык запас частьлар алган.

“Заря” хуҗалыгы техниканы яңарту белән нык-лап шөгыльләнә. Узган ел 42 млн сумнан артыкка техника алганнар, запас частьларга 6 млн сумнан артык кына тотылган.

Техниканы яңартырга теләгән хуҗалыкларга субсидияләр дә каралган. Мәсәлән, “30х70” схемасы буенча программа гамәлдә булачак. Сиптергеч алсаң, 50 процент бәясе күләмендә субсидия бирелә.

Норма буенча 1 гектар сөрүлек җиренә 60 килограмм ягулык тотылырга тиеш. “Ак барс” агрокомплексы” ширкәтендә артык та, ким дә түгел – нәкъ 60 килограмм! “Глонасс” системасы керткән-нән соң 3 ел эчендә 12 млн 672 мең сумлык ягулыкка экономия ясалган. Тракторлар, комбайннар, автомашиналар барысы да шушы система белән җиһазландырылган, техниканың кайда икән-леге һәм  хәрәкәте, ягулык чыгымы, эш вакыты – бар да контрольдә. Бу система кертелгәнче елга 787 тонна ягулык тоткан булсалар, хәзер – 691 тонна.

“Казанка” һәм “Заря”, “Яңарыш” хуҗалык-ларында әлеге сан нормага якын – 66, 67 һәм 68 килограмм. Шул ук вакытта 1 гектар сөрүлек җиренә 104 килограмм ягулык тотучылар да бар.

Инженерлар алдында төрле хезмәтләр (хезмәтне саклау, техника куркынычсызлыгы, юл хәрәкәте иминлеге, янгын куркынычсызлыгы) вәкилләре дә чыгыш ясады.