Республикада илкүләм проектларны яктырткан журналистларның хезмәте бәяләнәчәк

автор, 13 гыйнвар 2020 - 15:47

1498

Татарстанның Дәүләт Советы Рәисе Фәрит Мөхәммәтшин илкүләм проектларны яктыртуга журналистлар арасында бәйге игълан итү тәкъдиме белән чыкты. Бу хакта ул ТР Милли музеенда Россия Матбугат көненә багышланган бәйрәм чарасында әйтте.

Республикада илкүләм проектларны яктырткан журналистларның хезмәте бәяләнәчәк

Тәкъдимне «Татмедиа» да, журналистлар корпусы да хуплар дип ышануын белдерде Фәрит Мөхәммәтшин. Аның фикеренчә, бу журналистларны шушы тематикага тагы да зуррак кызыксынуы уянуга этәрәчәк.

«Республика һәм федераль ММЧ гына түгел, район-шәһәр журналистларын да җәлеп итәргә кирәк. Бу халыкның тормышын яхшырту, уңайлырак шартлар тудыру буенча бөтен ил алдында торган бурычны хәл итәргә ярдәм итәчәк», — диде ул. Бәйгегә 2020 ел ахырында Дәүләт Советында йомгак ясалачак.

Парламент башлыгы проектларны гамәлгә ашыруда халык теләктәшлеге, ризалыгы булуда ул массакүләм мәгълүмат чаралары роле зур булуын билгеләп узды. «Проектлар нәтиҗәсендә, һәр авыл, район, шәһәрдә тормыш шартлары яхшырачак, яңарачак. Журналистлар бу хакта яза, сөйли ала. Тапшыруларда бу хакта сөйләнергә тиеш. Илкүләм, республика проектлары ничек гамәлгә ашырылуын тоярга кирәк», — диде Фәрит Мөхәммәтшин.