Татарстан прокуроры Арчаның элекке прокуроры Мөбәрәк Әшрәповны 95 яшьлек юбилее белән котлады

Бүген Арчага Татарстан прокуроры Илдус Нәфыйков килде. Ул прокуратура органнары ветераны Мөбәрәк Әшрәповны 95 яшьлек юбилее белән котлады, аңа  «Татарстан Республикасы алдындагы казанышлары өчен» ордены медален тапшырды. Юбилярны бүләкләү турындагы Указны 2023 елның 26 июнендә Татарстан Республикасы Рәисе Рөстәм Миңнеханов имзалады.

Мөбарәк Әшрәповның тормыш юлы гади түгел: аңа сугыш чоры авырлыкларын, илне торгызуны күрергә туры килә, прокуратура органнарында хезмәт итә.

Бөек Ватан сугышы елларында Мөбарәк Әшрәпов өлкәннәр белән беррәттән авыр хезмәт юлы үтә.  Сугыштан соңг Казан юридик институтын тәмамлый. Аннары 37 елдан артык гомерен Законга хезмәт итүгә багышлады.

1954 елның октябрендә Кызыл Йолдыз районы прокуроры итеп билгеләнә, аннары ТАССРның Теләче, Саба һәм Арча районнары прокуратураларын җитәкли.

РСФСРның атказанган юристы. «1941-1945 еллар Бөек Ватан сугышында фидакарь хезмәт өчен» медале, «Фидакарь хезмәт өчен» Татарстан Республикасының медале, «I дәрәҗә «законга тугрылык өчен» билгесе, Руденко медале, СССР Генераль прокурорының һәм профсоюзлар Үзәк комитетының Мактау грамоталары белән бүләкләнгән.

Район башлыгы Илшат Нуриев юбилярга Рәхмәт хаты, бүләкләр тапшырды.

Юбилярны район прокуроры Ринат Кәримов тәбрикләде.