Татарстанда колледжларга укырга керү җиңеләйде: федераль эксперимент Арча агросәнәгать һөнәри көллиятендә дә гамәлгә ашырыла

Быел Татарстан киң колачлы федераль экспериментта катнаша. Аның кысаларында республиканың 51 көллиятендәге 40 ихтыяҗ зур булган белгечлекнең берсен сайлаучыларга бары тик ике мәҗбүри төп дәүләт имтиханы (ТДИ) — рус теле һәм математика тапшыру да җитә.

Экспериментта Арча агросәнәгать һөнәри көллияте дә катнаша. Бу – өстәмә имтиханнарсыз, туган якка якын урында сыйфатлы һөнәри белем алу өчен яхшы мөмкинлек.

Ике имтихан нәтиҗәләре буенча кабул ителә торган белгечлекләр:
Пешекче һәм кондитер эше;
Авыл хуҗалыгы техникасын эксплуатацияләү һәм ремонтлау;
Кул белән һәм өлешчә автоматлаштырылган эретеп ябыштыручы;
Автотранспорт чараларына техник хезмәт күрсәтү һәм ремонтлау;
Гомуми төзелеш эшләре остасы.

Шулай ук көллияттә газ белән тәэмин итү җиһазларын һәм системаларын монтажлау һәм эксплуатацияләү юнәлеше буенча да белгечләр әзерләнә. Бу белгечлеккә керү өчен дүрт ТДИ нәтиҗәләре кирәк.

Ни өчен Арча агросәнәгать һөнәри көллиятен сайларга?
Бушлай белем алу мөмкинлеге;
Беренче курслардан ук практикага юнәлеш, ә икенче курстан башлап студентлар Татарстанның алдынгы предприятиеләрендә җитди практик тәҗрибә туплый;
Уңайлы яшәү шартлары – читтән килүчеләр өчен 200 урынлы тулай торак каралган.

Хәзерге вакытта тулай торакта киң күләмле яңарту һәм ремонт эшләре алып барыла. Якын арада студентлар тагын да заманча һәм уңайлы шартларда белем алачак.

Әлеге эксперимент узган ел старт алды һәм «Яшьләр һәм балалар» милли проекты кысаларындагы «Профессионалитет» федераль проекты максатларына туры килә. Аның төп бурычы – мәктәп укучыларына иртәрәк һөнәри юнәлеш бирү һәм төбәк икътисады өчен квалификацияле белгечләр әзерләү.

Чыганак: район матбугат хезмәте