Арчаның 10 нчы балалар бакчасында төрле елларда хезмәт куйган ветераннар очрашты

Шушы көннәрдә безгә, Арча 10 нчы балалар бакчасына, биредә төрле елларда хезмәт куйган хөрмәтле апаларыбыз җыелды.

Без, бакча хезмәткәрләре һәм балалар, аларны шатланып каршы алдык. Өлкәннәребез нәниләрнең чыгышларын, җыр-биюләрен бик яратып кабул иттеләр. Үзләре дә, төрле уеннарда катнашып, осталыкларын сынадылар, яшьлек җырларын искә төшерделәр.

Очрашу бәйрәм табыны артында дәвам итте. Бергә җыелу олылар күңелендә хатирәләрне яңартты, алар истәлекләре белән уртаклаштылар, рәхәтләнеп бер- берсе белән аралаштылар, бакча һәм аның бүгенге тормышы белән таныштылар.

Балалар тәрбияләүдә үз өлешләрен керткән элеккеге хезмәттәшләребез, эшебезгә уңай бәя биреп, очрашулар тагын насыйп булсын дигән теләктә саубуллаштылар.

Бакчаның татар теле тәрбиячесе Рәмзия Гарифуллина