Рәхмәт, мәктәбебезгә!

Без дә, Арча өченче мәктәбенең бер төркем ветераннары, шушы сихри матурлыкка сокланып, үзебезгә бик тә якын һәм кадерле булган уку йортына кунакка юнәлдек. Бу матур традиция инде күп еллар дәвам итә. Коллектив, ел да шулай безне хөрмәтләп, матур кичәгә дәшә, ә без килергә атлыгып торабыз. Быел мәктәп җитәкчелеге алышса да, күркәм традиция  сакланды. Безне һәр елдагыча якты чырай белән ишек төбеннән үк каршы алдылар, мәктәп буенча экскурсия үткәрделәр. Кызыксынып, музейдагы экспонатларны, коридордагы стендларны карадык – яшьлек хатирәләре белән уртаклаштык. Укучылар, укытучылар көче белән әзерләнгән бай эчтәлекле концерт та карадык, балаларның  кыюлыгына, булдыклылыгына сокланып утырдык. Концерттан соң җыелышып күмәк фотога төштек. Аннары бәйрәм бай өстәл артында дәвам итте.

Яңа директор Гөлнара Рафисовна да иганәчеләр тапкан, күрәсең, табын бик мул иде. Без, өлкәннәр, мәктәп тормышыннан хатирәләрне дә яңарттык, җыр-биюгә дә урын таптык, матур теләкләребезне дә җиткердек. Вакыт үткәне сизелмәде дә. Соңыннан, коллективка олы рәхмәтебезне җиткереп, эшләрендә уңышлар теләп, канәгатьлек хисләре белән таралыштык. Еллар тыныч булып, кабат очрашулар язсын!

Бәйрәмдә катнашкан өлкәннәр исеменнән,
 Наилә Миңнемуллина.
Арча