Тырышлык бушка китми

Һәр елны булып үтә торган  “Дуслык сыйныфы серләре” республика конкурсының мәктәп этабы Арчаның икенче мәктәбендә декабрь азагында  үтеп, 9А сыйныфы җиңүче булды. Алар гыйнвар каникуллары дип тормадылар, җай чыккан саен мәктәпкә килеп, район этабына әзерлек эшләрен  алып бардылар. Бу бәйгегә әзерлек вакытында бигрәк тә ата-аналар комитеты күп көч түкте кебек. Барлык репетицияләргә килеп, тырышып әзерләнүнең нәтиҗәсе дә булмый калмады. 
12, 13 гыйнвар көннәрендә Г.Курсави исемендәге күппрофильле лицейда  “Дуслык сыйныфы серләре“ республика конкурсының  район этабы үтәчәге турында хәбәр килде. 9А сыйныфы укучылары, класс җитәкчесе Рәсимә Ибраева  һәм ата-аналар комитеты белән берлектә 13 гыйнварда 5нче булып чыгыш ясадылар. Әйбәт сан чыкты жирәбә вакытында, чыгыш та “5”лелек булды.      
Алар үзләренең чыгышларында эшче яшьләр ролен үтәделәр. Киләчәкләрен ничек үз тырышлыклары белән төзүләрен күрсәттеләр.  Бик эчтәлекле итеп әзерләнгән күргәзмәдә дә шушы тема яктыртылды. Сәхнәдә ясалган  чыгыш та (визитка) ошады комиссия әгъзаларына.  
Әлбәттә, барысы да бик нык дулкынландылар, борчылдылар, тырыштылар. Ә тырышлык беркайчан да бушка китми.  Иң мөһиме – алар беренчелекне яулап, үз көчләрен акладылар.    
Бердәм сыйныфка киләчәктә дә уңышлар телик. Алда, кемнәр өчендер чыгарылыш елы, зур сынаулар көтә. Егетләр-кызлар хәзергә кадәр сынатмадылар, киләчәктә дә сынатмаслар.   

 Камилә Мифтахова,
 Арчаның 2нче мәктәбе укучысы