«Арча Шамкае» Марат Газизов истәлегенә: «Бик гаилә җанлы иде, авыл дип янып яшәде»

Һәрвакыт елмаеп, янып яшәгән, башкаларның да кәефен гел күтәреп, яшәргә дәрт биреп торган, шат күңелле «Арча Шамкае»ның кинәт кенә вафат булуын кабул итүе дә авыр. Әле генә туйларны кыздырган Марат Газизов – бүген гүр иясе. Бүген, өйлә вакыты кергәнче аны җирләгәннәр, дип беләм. 47 яшьлек түм-түгәрәк, энергиясе ташып торган Марат Газизов инсульт кичергән. Аны аңсыз хәлдә Казанга, МКДЦга алып килгәннәр, операция булган. Якыннары, операциядән соң тернәкләнер, дип өметләнгән.

«Күпме энергия, күпме харизма иде бу егеттә»

Социаль челтәрләрдә бик күп кеше кайгы уртаклаша, ул күп кенә артистлар белән дус булган, аралашкан.

«Дустым, урының оҗмахта булсын. Шундый позитив, яхшы алып баручы иде», – дип язган Фирдүс Тямаев. Алар бер бәйрәмдә бергә чыгыш ясаганда төшерелгән видео заманында бик популяр иде. Шушы көннәрдә дә ул, кабат-кабат, социаль челтәрләрдә килеп чыга.

«Эх, бик иртә… Шундый ачык күңелле, рәхәт кеше иде. Тыныч йокла, коллега», – дип язып калдырган алып баручы Газинур Фәйзуллин.

«Күпме энергия, күпме харизма иде бу егеттә. «Иде» дип язарга кул да бармый. Бик кызганыч, бик жәл… Эх, Марат, Марат, урының җәннәт түрләрендә булсын. Минем уйлавымча, әгәр алып баручылар арасында бәйге оештырсалар, «Иң халыкчан алып баручы» номинациясендә җиңүче Марат булыр иде», – дип язган алып баручы Булат Бәйрәмов.

«Ышанып булмый… Бүген бар кеше, иртәгә – юк! Яшәргә дә яшәргә иде дә бит. Марат дус, урының оҗмах түрләрендә булсын», – дип язган Рамил Шарәпов.

«Барыбыз өчен дә шат күңелле, көләч йөзле кеше булып истә калырсыз», – дип язган Зәринә Хәсәншина.

Илназ һәм Гүзәл Бахлар да 2009 елдагы фотоны урнаштырганнар.

«21нче май, 2009 ел. Чаллыда Рөстәм Закиров концертында Марат Газизов белән бергә бик күңелле итеп эшләгән идек. Марат, брат, син кешелекле чын кеше булдың. Урының җәннәт түрләрендә булсын. Бик иртә киттең. Шат күңелле, эчкерсез кеше идең. Авыр туфрагың җиңел булсын», – дип язаннар.

«Авыл дип яшәде»

«Марат Газизов белән бәйле истәлекләр белән уртаклашсагыз иде», – дип, алып баручы Зөлфәт Зиннуровка шалтыраттым. Ул әле бу хәбәрне ишетмәгән булып чыкты. «Истәлекләр барлыйбыз, дисез. Бер-бер хәл будымы әллә?» – дип аптырап та калды.

Эх, кызганыч, тернәкләнеп китә алмаган… Бик кызганыч, шәп егет иде. Без аның 45 яшьлек юбилеенда булган идек, шундый матур, рәхәт оештырды өендә. Баян тартып, җырлашып… Әле генә булган кебек. Ул минем берничә туган көнемне алып барды. Сеңелкәш, кияүнең туган көннәрен дә алып барганы булды. Безгә шундый якын иде ул. Шулай бәйрәмнәргә чакыргалый идем, егетләр белән җыелсак та, бәби туе булса да, чакыра идем. Үзара гел йөрешеп, аралашып тордык. Бик ачык күңелле, шәп кеше иде. Ул бик гаилә җанлы иде. Авылга гашыйк кеше иде, авыл дип янып яшәде, умарталар белән мәш килде. Берничә ел элек улы машина йөртүгә «права» алды, шуңа да бик сөенеп йөргәнен хәтерлим. Бабай булып өлгерде. Ул бөтен кешегә ягымлы була белде, – дип сөйләде ул.

Бәйрәмнәр алып баручы Айрат Ильясов Марат Газизов белән соңгы аралашуын искә алды. «Арча Шамкае» аны 24 июль көнне туган көне белән котлаган булган.

Туган көн белән котлап, тавышлы сообщение җибәргән иде. Рәхмәтләр әйтеп, күрешергә язсын, дип теләп калган идек. Ул төркеме белән бик күп эшли иде. Атнасына берничә чара үткәрәләр. «Шулай күп эшләп, ничек армыйсыз, молодцы, Аллаһ ярдәм бирсен», – дип язган идем. Без бик күптәннән таныш инде. Күп артистлар белән Арчага йөри идем, шулай берсендә танышып киттек. Аны чараларга да чакырган бар. Күрешкәндә «брат» дип сөйләшә идек. Бик ачык йөзле, ачык күңелле иде. Бервакытта да сүгенеп сөйләшкәнен дә ишеткәнем булмады. Бик кызганыч, бик кискен булды, – дип сөйләде ул.

«Арча Шамкае»ның «ВКонтакте» дагы төркеменә күз салсагыз, анда бер негатив юк. Халык «Арча Шамкае»на гел җылы сүзләр, рәхмәтләр, соклану язган. Ул – чыннан да халык мәхәббәтен яулаган гади бер авыл егете.

«Һәрбер ситуациядән уен-көлке белән чыга торган кешеләр бик сирәк була»

Туйлар, мәҗлесләрне күңелле итеп алып баручы «Арча Шамкае» соңгы туйны Мамадышта уздырган. Мамадыш районының Дүсмәт авылы яшьләре Регина һәм Николай Козловлар гаиләләрендәге иң җаваплы бәйрәмне алып баруны «Арча Шамкае»на тапшырган булган.

Яшьләр сүзләренчә, Марат Газизов энергетикасы, җиңеллеге, шуклыгы белән бик тиз арада үзенә җәлеп иткән. Яшь гаилә аның вафаты турында ишеткәннән соң шок хәлендә. «Туебызда биеп, җырлап, очып кына йөрде», – ди яшь килен Регина Козлова.

26 июль көнне безнең туйны Марат Газизов алып барды. Аны алдан белешеп, ярты ел алдан сөйләшеп куйган идек. Үзебезнең туй мәҗлесен нәкъ менә ул алып барсын дип теләдек. Аның вафат булуын ишеттек тә, ирем белән шок хәлендә калдык. Туй көнне ул безгә якын кеше кебек булып беткән иде инде. Кем уйлаган нәкъ 1 атнадан соң аның гомере өзелер, дип.

Марат Газизов бик җаваплы, төгәл кеше булып чыкты. Туйга кагылышлы сорауларны, хәтта күрешмичә дә, телефон аша да җиңел генә хәл иттек. Безнең туй көнендә һәрвакыттагыча бик шат күңелле иде, очып кына йөрде, җырлады, биеде: бар халык аның осталыгына шаккатты. Чирләп торган кешегә бер дә охшамаган иде, янып торды, энергетикасы бик көчле.

Туйны башыннан ахырына кадәр тиешенчә, җиренә җиткереп, югары дәрәҗәдә алып барды. Әле үзебез дә, кунакларыбыз да «Арча Шамкае» алып барган туйдагы хисләр, энергетика белән йөрибез. Бик шәп узган иде.

Кеше гомере чиләктәге су кебек: бүген бар, иртәгә – юк... Марат абый кебек шат күңелле, позитив кешеләр, һәрбер ситуациядән уен-көлке белән чыга торган кешеләр бик сирәк була... Гаиләсенә, якыннарына күркәм сабырлык телибез. Урыны оҗмах түрләрендә булсын... Бик кызганыч...» – дип уртаклашты Регина.

«Беренче күргәч, ничек кеше шундый була ала икән, дип исем китте»

«Интертат»та аш-су рецептлары белән уртаклашып баручы хезмәттәшем Гөлүзә апа Василова аның белән бәйле җылы истәлекләрен сөйләде.

Марат Газизов – тормыш иптәшемнең яшьлек дусты, кияү ягыннан туган булып чыга. Яшь вакыттан ук «компания кешесе» булган, эчү-тарту кебек гадәтләре булмаган. Иремнең туганнары үткәргән күп кенә мәҗлесләрне Марат алып барды. Алып бармаса, кунак булып килә иде, анда да, котлап, мәзәген сөйләп алыр иде, җырын җырлар иде. Әле күптән түгел генә аның әнисе Сания апа белән бер мәҗлестә булган идек, шунда сөйләшеп киттек. Менә Марат кемгә охшаган икән, дип уйлап куйдым. Аның әнисе дә җор телле, бөтен кеше белән аралаша, көлдерә, бик күңелле ханым.

Маратны беренче тапкыр бер туганыбызның юбилеенда күрдем. Мин аңа шаккаттым. Шундый түм-түгәрәк, җитез! Ничек кеше шундый була ала икән, дип исем китте. Җырлаган җиреннән сикереп биеп китә, шуннан кинәт кенә туктый, урындыкка менеп баса да тыпырдатып бии, шуннан кеткелдәп, яңгыратып көлеп җибәрә. Бәйрәмне гөрләтеп алып бара торган кеше иде. Кайбер бәйрәмнәрдә, бу тамада кайчан сөйләп бетерә инде, кайчан уенны уйнатып бетерә инде, дип көтеп утырасың, ә Марат үткәргән мәҗлесләрдә бер дә алай булганы юк.

Ул бик күңелле кеше иде. Күргән һәр кешегә сәлам бирер, хәл-әхвәлләрен сорашыр иде. Шулай кинәт китеп баруына берничек тә ышанып булмый әле, – дип сөйләде.

Марат Газизов төгәл бер атна элек кенә, ягъни 28 июльдә, бәби чәе мәҗлесен алып барган. Анда да кунаклар «Арча Шамкае»н яратып калган.

Марат Газизов тумышы белән Арча районының Яңа Кенәр авылыннан. Яшь вакытында әтисез калган. Ул үзе 2 бала әтисе. «Арча Шамкае» күпмедер дәрәҗәдә легендар Рәшит Шамкайның дәвамчысы булгандыр. Марат Газизов шуклыгы, шаянлыгы белән халык йөрәгендә калыр. Аның моңлы итеп, үз көенә генә җырлавы, тавышы да онытылмас.

Марат Газизовның гаиләсе, туганнары, дуслары, хезмәттәшләренең тирән кайгысын уртаклашабыз. Аллаһы Тәгалә сезгә күркәм сабырлык бирсен!

Чыганак: https://intertat.tatar/news/arca-samkae-marat-gazizov-istalegena-bik-gaila-anly-ide-avyl-dip-yanyp-yasade-5867666