Янгын хәбәрчесе һәр йортта кирәк

Безнең гражданнарның күбесе фатирларында янгын беркайчан да чыкмас дип уйлый. Янгыннарның төп сәбәпләре – ут белән саксыз эш итү, электр җиһазларын һәм көнкүреш электр приборларын дөрес урнаштырмау һәм эксплуатацияләү, мич һәм төтен чыга торган юлның төзек булмавы. 
Автоном янгын хәбәрчесен мөстәкыйль рәвештә дә урнаштырырга мөмкин. Алар түшәмгә яки диварларның өске өлешенә беркетелә, электр челтәреннән туклану таләп ителми. Батареяны үз вакытында, якынча ярты елга бер тапкыр алыштырырга гына кирәк. Янып-сүнеп торучы кызыл индикаторы приборның төзеклеген күрсәтә. Кечкенә генә янгын чыкканда һәм төтенләгән очракта датчиклар, яңгыравыклы тавыш чыгарып, тиз генә янгын турында хәбәр итә. Балалар һәм өлкән яшьтәгеләр кыска вакыт эчендә йортларда үзләре генә калганда автоном янгын белдергечләрен урнаштыру аеруча актуаль.  
Янгын хәбәрчеләре инде бик күп гомерләрне коткарып калды. Шулай ук ут сүндергечләрне булдырыгыз, алар машиналарда гына түгел, безнең йортларда һәм ишегалларында да булырга тиеш. Электр үткәргечләрне үз вакытында алыштырырга һәм җылыту мичләрен, төтен юлларын вакытында ремонтларга онытмагыз!
Адель Шакирҗанов,
Арча һәм Әтнә районнары буенча  янгын күзәтчелеге бүлеге инспекторы