«Крокус Сити Холл»да теракт вакытында зыян күрүчеләр саны 360 кешегә җитте

Бу хакта ТАСС агентлыгына катастрофалар медицина үзәгендә хәбәр иттеләр.

«Чәршәмбе иртәсенә булган мәгълүматлар буенча, теракт вакытында 360 кеше зыян күргән, шуларның унбере – балалар», - дип хәбәр итә агентлык.

Мәскәү өлкәсендәге концерт залына җомга кичендә, 22 мартта, һөҗүм иттеләр. Тикшерү комитетының соңгы мәгълүматлары буенча, теракт вакытында 139 кеше, шул исәптән өч бала һәлак булган.

Хәзерге вакытта теракт турындагы эш буенча тоткарланган унбер фигурантның сигезе Мәскәүнең Басман суды карары белән ике айга кулга алынган. Җинаять эшен тикшерү дәвам итә.

Чыганак: Татар-информ