Путин кайбер хезмәткәрләр өчен хәрби хезмәтне кичектерү турында законга кул куйган

Президент Владимир Путин хәрби хезмәтне кичектерү хокукына ия булучылар исемлеген киңәйтүне күздә тоткан яңа законга кул куйган. Хокукый мәгълүматлар рәсми порталына урнаштырылган документта гамәлдәге законга кайбер әһәмиятле төзәтмәләр кертелә. Законда төп яңалык – Прокуратура, Тикшерү комитетының тикшерү органнары һәм учреждениеләре хезмәткәрләре өчен хәрби хезмәтне кичектерү.

Бу чара югары белемгә һәм махсус званиеләргә ия булучыларга кагыла. Моңа кадәр бары тик эчке эшләр органнары, Янгынга каршы дәүләт хезмәте, җинаять-башкару системасы учреждениеләре, җәза чараларын мәҗбүри үтәтү органнары һәм таможня органнары хезмәткәрләренә генә шундый өстенлек бирелә иде. Законда шулай ук прокуратурага яки Тикшерү комитетына эшкә күчүчеләрне контракт буенча хәрби хезмәттән вакытыннан алда азат итү мөмкинлеге дә күздә тотылган.

Моннан тыш бу гражданнар хәрби җыеннардан азат ителә. Россия Хөкүмәте әлеге категориядәге хезмәткәрләрне махсус хәрби учетка алуның яңа тәртибен билгеләячәк. Яңа закон 2024 елның 1 сентябреннән үз көченә керә.

https://vatantat.ru/2024/07/147932/