Айван авылында Ураза гаете уңаеннан бәйрәм

Бәйрәм буласын интернет челтәрләрдәге Авылдашлар төркемендә язып элделәр. Халык алдан белеп торды.

Фермер Гатауллин Нафиль: "Мәчеттә хәзрәт Илшат Кәримуллин белән  авылдашлар бергә җыелган вакытта, әйдәгез, балалар, авыл халкы белән Ураза гаете көнне бәйрәм оештырабыз, дип сөйләштек", - дип сөйләде.

Бәйрәмне авыл мулласы Илшат Кәримуллин, авылдашлар Нафил Гатауллин, Таһир Вәлиев, Рәнис Яһудин, Зөлфәт Нурмөхәммәтов оештырды. Айван мәдәният йорты җитәкчесе Рәмзия Миннәшәева, сәнгать җитәкчесе Гөлнара Гыйниятуллина, китапханә мөдире Гөлнар Шәмсетдинова һ.б. төрле чаралар үткәрделәр.

Бәйрәмне хәзрәт Илшат Кәримуллин догалар укып башлап җибәрә. Авылдашлар Альмира Гатауллина, Ләйлә Шакирова бәйрәм белән котлап, матур теләкләр әйттеләр. Аннан балалар арасында яттан догалар сөйләү ярышлары башланып китә. Бәйрәм төрле ярышлар белән дәвам итә. Капчык киеп йөгерү, таяк, аркан тартышу һ.б. Осталык дәресләре дә үткәрәләр.

Ничек итеп коймак камыры ясарга, каз канатыннан май канаты ясарга - болар балалар өчен кызыклы дәресләр була. Ул арада пылау да пешеп чыга, өч самоварда чәй кайный, коймаклар пешә. Коймак камырын Гөлчәчәк Мусина өеннән үк ясап алып килеп пешерә. Авыл халкы да бәйрәмгә күчтәнәчләре белән килә. Сый-нигьмәттән авыз итеп, бүләкләр алып, бик канәгать булып таралышалар. Айван авылында мондый Ураза гаете бәйрәме беренче тапкыр булды, диделәр. Киләсе очрашуларга кадәр!