Арча муниципаль районында традицион гомумрайон планеркасы узды. Җыелышта райондагы предприятие, учреждение һәм ведомство җитәкчеләре катнашты.
Киңәшмә барышында узган атна нәтиҗәләренә йомгак ясалды, шулай ук алдагы көннәрдә хәл ителергә тиешле актуаль мәсьәләләр каралды.
Көн тәртибендә — район тормышының мөһим юнәлешләре
Планеркада район эшчәнлеген яктырту, массакүләм мәгълүмат чаралары белән хезмәттәшлек итү һәм мәгълүмати сәясәт мәсьәләләре турында фикер алыштылар. Арча шәһәре башкарма комитеты җитәкчесе Рамил Багаутдинов шәһәрне төзекләндерү эшләренең барышы турында хисап тотты.
Яшьләр сәясәте юнәлешендә «Алгарыш» яшьләр үзәге директоры Айсылу Хаҗиева тормышка ашырылган проектлар һәм яшь буын белән эшләү планнары хакында сөйләде. Киләсе атнага төп чаралар графигы һәм протокол йөкләмәләре дә расланды. Бирелгән барлык бурычлар җаваплы ведомстволарга бүлеп бирелде һәм контрольгә алынды.
Иң яхшы белгечләргә хөрмәт күрсәтелде
Җыелыш барышында хезмәт алдынгыларын бүләкләү тантанасы да узды. Намуслы хезмәтләре өчен һәм Урман хезмәткәрләре көне уңаеннан Татарстан Республикасы Арча урманчылыгы коллективы, аның җитәкчесе — урманчы Шамил Мәхмүт улы Хәйруллин, шулай ук Татарстан Республикасы Арча урман хуҗалыгы коллективы һәм директоры Нияз Рәфхәт улы Саляхов бүләкләнде.
Авыл хуҗалыгы өлкәсендәге казанышлары өчен, терлекчелек буенча республика бәйгесендә җиңүчеләр дә хөрмәтләнде. Алар арасында:
- «Северный» ҖЧҖ зоотехник-селекционеры Алсу Камил кызы Камалетдинова;
- «Яңарыш» ҖЧҖ машина белән сыер саву операторы Ландыш Наил кызы Носкова;
- «Игенче» ҖЧҖ ясалма орлыкландыру технологы Булат Марат улы Гарапшин;
- «Игенче» ҖЧҖ ясалма орлыкландыру технологы Илназ Борис улы Иванов.
Нет комментариев