Эшмәкәр Нурия Гыймадиева ифтар үткәрде

90лап кеше җыелды. Арча станциясендә яшәүче абыстай Әлфия апа Рәхимова догалар укыды, акыллы вәгазьләр сөйләде. Аллаһы Тәгаләне зурлап тоткан уразалар кабул булсын.

“Аллаһ ризалыгы өчен укыган догаларның әҗер саваплары бакыйлыкка күчкән әти-әниемә, якыннарыма барып ирешсен өчен, изге ниятләр белән җәмәгать туклану системасында, сәүдә өлкәсендә эшләп, лаеклы ялга чыккан, бүгенге көндә эшләүче хезмәткәрләргә хөрмәт йөзеннән үткәрдем Ифтар ашын. Ил-көннәребез тыныч, үзебез исән-сау булыйк!” – дип сөйләде Нурия ханым.

Бу очрашу үзе бер тарихи мизгелләр... Ул күрешүләр, кочаклашып, хәл-әхвәл сорашулар... Рәхмәт Нуриягә, кайчан күрешер идек әле, дип күз яшьләрен сөртә ветераннар. Ә өстәлләрдә туй сые...

Монда элеккеге һәм бүгенге хезмәттәшләр генә түгел, туганнар,  балачак һәм бүгенге дуслар, сыйныфташ иптәш кызлар, күршеләр дә бар. Шекә авылыннан балачак дус кызлары Әлфия белән Резедә дә килгәннәр. Питомникта бергә үскән күрше кызы Резедә, кияүгә чыгып, хәзер Шекә  авылында яши. Ә Әлфия үзе Шекә авылыннан. Рәхмәт, Нурия мине дә калдырмый. Без Арчаның 2нче мәктәбендә бер парта артында утырып укыдык, дуслар булдык.

Ахырдан бар да Нурия Әхмәтовнага рәхмәт әйтте. Гади хезмәт кешесенә мондый кадер-хөрмәт күрсәтү тагын кайда бар икән дип, ихлас күңелдән исәнлек-саулык, тигезлек, балалар бәхете, эшендә уңышлар теләделәр.