Игенчеләр өчен иң җаваплы чор җитте

Аңа кадәр район авыл хуҗалыгы һәм азык-төлек идарәсендә хуҗалыкларның эш планнарын кабул итү булган иде.
Гомумән алганда, комиссия хуҗалыкларның әзерлегенә әйбәт дигән бәя бирде. Булган вак-төяк кимчелекләрне төзәтергә әле вакыт бар. Иң мөһиме – эшләргә кеше җитәрлек, зур проблемалар юк.

Иң югары хезмәт хакы “Яңарыш“ ширкәтендә. “Быел тагын да арттырабыз, – ди хуҗалык җитәкчесе Илгизәр Садыйков. Хуҗалыкта бар да әзер. Уҗым тукландыруны башлап җибәрделәр инде.

– Барлык хуҗалык-ларга да хезмәт хакларын арттырырга тәкъдим ителде, – ди район авыл хуҗалыгы һәм азык-төлек идарәсенең механикалаштыру бүлеге киңәшчесе Марат Шәйнуров.

Россия авыл хуҗалыгы үзәгенең Арча район филиалы белгечләре район хуҗалыкларында орлык агулау  машиналарының әзерлеген тикшереп чыктылар. Барысы  31 агулау машинасы бар. Шуларның 29ы эшкә әзер. “Ватан“, “Кырлай“, “Курса МТСы“, “Ак барс“ агрокомплексы“, “Яңарыш“, “Игенче“, “Заря“, “Северный“ ширкәтләре әзерлек буенча иң югары баллар алдылар.