Нәни Нариман бүген өенә кайтты

Нәни Нариман бүген өенә кайтты. Кәче авылыннан Фәнисә белән Ринат Галәвиевларның икенче балалары туды.  Бәхете белән тусын. Бүген Казаннан бала тудыру йортыннан кайтканда Калинино мәчетенә кереп чыгалар. Мулла балага исем куша. Без бу гаиләгә исәнлек-саулык, тигезлек, балалар бәхете телибез. Кәче авылыннан Фәнисә Галәвиева белән гел очрашып торабыз. Беренче тапкыр моннан бер ел элек Кәче авылында күп балалы Вәлиәхмәтовлар йорты янгач очраштык. Ул аларга акчалата, матди  ярдәм оештыруда булышты. Вәлиәхмәтовлар күмәк көч белән Кәче авылында яңа йорт салып чыктылар. Һәм тагын Фәнисә белән җәен очраштык. Арчаның Казансу паркындагы күлдә бер хатын-кыз суга бата язды. Без дә шунда су коена идек. Ә Фәнисә шул вакыт кызы, ире белән күл кырыена килеп туктадылар гына. Бу хәлне күреп, ире Ринат шунда ук коткарырга суга сикерде. Ә Фәнисә тиз генә  телефоннан ашыгыч ярдәм чакырды. Ярдәмчел кешеләр... Һәм менә Фәнисә улы туган көнне үк безнең белән сөенече белән уртаклашты. Казанның "Красный крест" балалар тудыру йортында. Без бары тик бу гаиләгә бәхет кенә телибез!