Наркотикларга каршы тору комиссиясе утырышында

Аны район башлыгы,  комиссия рәисе Илшат Нуриев алып барды.

Утырышта мәгариф идарәсе җитәкчесе урынбасары Лия Ильина яшьләрнең наркотикларга каршы волонтерлар хәрәкәте үсеше һәм сәламәт яшәү рәвешен пропагандалау   турында чыгыш ясады. 

Районның "Форпост" оешмасы җитәкчесе Илназ Зәйнуллин профилактик исәптә торучы яшүсмерләрнең сәламәт яшәү рәвешен формалаштыру чараларында катнашулары турында сөйләде.

 Ике докладчыга да Илшат Габделфәртович киләчәктә бу юнәлештә  эшне активлаштырырга тәкъдим итте.

Комиссия сәркатибе Алинә Яруллина чыгышыннан күренгәнчә, бүгенге көндә районда 27 кеше наркотиклар кулланган өчен исәптә тора. Узган елга караганда 9 кешегә кимрәк.

Ләкин наркоманнар кимеде дип тынычланырга кирәкми. Район прокуроры Ринат Кәримов билгеләп үткәнчә, бу айсбергның күзгә күренеп торган өлеше генә булырга мөмкин . 

Соңыннан утырышта катнашучылар яңгыраган барлык тәкъдимнәрне исәпкә алып комиссиянең киләсе елга эш планын кабул иттеләр.