Тәлгать Әхмәтов истәлегенә волейбол ярышлары булды

Кеше китә, җыры кала дигәндәй, яхшы тренерны онытмыйлар, эшен дәвам итәләр. Арча мәгариф хезмәткәрләре профсоюз оешмасы да (җитәкчесе Вакыйф Харисов) Тәлгать Әхмәтов истәлегенә балалар бакчаларында эшләүчеләр арасында волейбол ярышлары оештырды. 10 команда катнашты. Җирәбә салу нигезендә ике төркем оешты. Һәр төркемдә 1,2нче урыннарны алган командалар үзара очрашты.

3нче урын өчен уенда Арчаның 11нче балалар бакчасы командасы Арчаның 8нче бакчасы командасын җиңде. Финалда Арчаның 5нче бакчасы командасы 9нчы бакча командасын җиңеп, күчмә кубокны яулады. Ә иң яхшы уенчы Арчаның 5нче бакчасы тәрбиячесе Адилә Заһидуллина булды.

Җиңүчеләр Мактау грамоталары һәм барлык уенчылар да истәлекле бүләкләр белән бүләкләнде.

Профсоюз оешмасы уенны оештыруда ярдәм иткәннәре өчен Арча педагогика көллияте студентлары Әмир Мөхәммәтҗановка, Данис Галимҗановка, Регина Һадиевага һәм Дилә Усмановага, “Арча“ спорткомплексы администрациясенә рәхмәт әйтә. Киләсе очрашуларга кадәр!