Юлда һәрвакыт саклык кирәк

Әлеге чараның максаты – балалар юл-транспорт травматизмын кисәтү. Бу елның дүрт аенда гына да 16 яшькәчә балалар катнашында 100 юл-транспорт һәлакәте теркәлгән. Шуларда 3 бала һәлак булган, 104 бала төрле авырлыктагы тән җәрәхәтләре алган.

Статистик мәгълүматларга күз салганда, 16 яшькә кадәрге балалар катнашындагы юл-транспорт һәлакәтләренең өчтән бер өлеше җәйге айларга туры килә. Мәсәлән, 2021 елның июнь-август айларында 153 юл-транспорт һәлакәте булган, аларда биш бала үлгән (2021 ел дәвамында юл һәлакәтендә барлыгы 15 бала һәлак булган), 175 бала зыян күргән.  

Шунысы куанычлы, безнең Арча районында быел дүрт айда балалар катнашында аварияләр теркәлмәгән. Калган айларда да алар булмасын, балалар зыян күрмәсен иде.

– Юл хәрәкәтендә катнашучыларның барысы да сак һәм игътибарлы булсыннар, әти-әниләр балалар куркынычсызлыгын саклауга җитди карасыннар иде, – диде Россия Эчке эшләр министрлыгы Арча эчке эшләр бүлегенең ЮХИДИ идарәсе җитәкчесе Ришат Хуҗин. – Даими рәвештә балаларына юлда йөрү кагыйдәләрен исләренә төшереп тору да ярап куя. Алда озын каникуллар. Бу чорда аеруча игътибарлы булырга, балаларны күз алдыннан югалтмаска кирәк.