Арск-Информ
  • Рус Тат
  • Биектау районы Ямаширмә авылында янгын: «Балаларым исән калды дип сөенәм» ("Интертат", Гөлназ Хәбибуллина)

    26 июнь көнне Биектау районы Ямаширмә авылында яшәүче Нәҗмиевләр хуҗалыгында янгын чыгып, йорт-җирләре кара кисәүгә әйләнгән.

    «Төнлә чыкса, беребез дә исән каласы түгел идек»

    Карак алса - берне ала, ут алса - бетереп ала», - дип белми әйтмәгән борынгылар. Ярты сәгать эчендә ике балалы Нәҗмиевләр гаиләсе бер кат күлмәктән урамда утырып кала. Гөрләп торган тормышларының асты өскә килә.

    И, җаныем, менә шундый хәлләр инде бездә, - дип еламсырап башлады сүзен Кадрия апа Нәҗмиева. - Мәхшәр көнемени, ярты сәгать эчендә яндык бит. Ярты сәгать эчендә! 

     

    Фото: © Авыл төркемендәге фото

    15 яшьлек олы малаем өченче яртыда кайтам дип сыйныфташлары белән чыгып киткән иде. Тормыш иптәшем һәм кече малаем белән бәрәңге чүбе утарга дип бакчага чыктык. Өч тулганда иптәшем өй тирәсен урап килде. «Малай кайткан, аз гына ятып торам дип әйтте»,- диде. Бераз эшләгәч, тукта, уятыйм әле үзен дип йортка таба керә башладым да, әллә нәрсә уйлап, кире борылдым. Шул вакытта кергән булсам, бәлки янгынны йортка күчеп өлгергәнче күреп алыр идем.

    Шуннан соң 6-7 рәт бәрәңге кенә эшкәрткәнбездер инде. Кемнеңдер: «Нишләп ятасыз монда, янып үләсез бит», - дип әче итеп кычкырган тавышына кулымнан тәпкем төшеп китте. Җыйнаулашып өйгә йөгердек. Иптәшем баланың өйдә калганын исенә төшереп, аны уятырга, документларны алырга кушты. Үзе су сибәргә дип чапты.

    Өебез агач, эчке ягы мдф белән эшләнгән иде. Ул исә бик әшәке ис чыгарып, ап-ак төтен булып яна икән. Ярый әле документларыбыз бер урында гына тора. Шулай булмаса, төтен эчендә таба алмаган булыр идем. Үземне үзем белештерә торган дәрәҗәдә түгел идем анда. Тиз генә пакеты белән документларны эләктердем дә, бакча ягына болгап аттым. Улыма урамга чыгарга күрше егете ярдәм итте.

    Реклама

    Ул арада ут бөтен йортны, хуҗалыкны чормап алды. Өй, сарай, мунча күз алдыбызда янып бетте. Йорт янәшәсендәге кирпеч корылмага кадәр җимерелде, - ди Кадрия апа.

    Башларына хәсрәт төшкән, санаулы минутлар эчендә бернәрсәсез калган Кадрия апа ярый үзебез исән-сау дип шөкер итә.

    Ярый ла көндез чыккан, дим. Ул янгын төнлә чыккан булса, беребез дә исән каласы булмаган икән. Олы улым ничек чыгып өлгерде бит! Балаларым өйдә калып, шунда янып үлсә, бер көн дә яши алмас, шунда ук артларыннан китәр идем. Болай да йөрәкләрем урыныннан чыгып китәрдәй булып уйный. Алай да үземне кулга алырга тырышам. «Балаларың исән, янәшәңдә, Кадрия. Калганы булыр», - дип тынычландырам үземне.

    Башка елларда күп итеп тавыклар, бройлерлар ала торган идем. Быел бер баш кош-корт та алмадым. Күңелем сизенгәндер сарайларыбыздан сыңар казык та калмаячагын. Бу - иремнең төп йорты. Кайнана-кайнаталар тырышлык белән көн күргән нигез. Алардан калган, соңрак үзебез эшләп тапкан бөтен мал көлгә әверелде.

    Дәвамын укыгыз https://intertat.tatar/news/biektau-raiony-yamasirma-avylynda-yangyn-balalarym-isan-kaldy-dip-soenam-5853803

    Хәзер Арча һәм Арча районы яңалыкларын безнең Telegram-каналдан да белә аласыз

     

    Иң мөһим һәм кызыклы язмаларны Татмедиа Telegram-каналында укыгыз


    Реклама

    Нравится
    Поделиться:
    Реклама
    Комментарии (0)
    Осталось символов: