Йомырка кабыгын ташламагыз, аның файдасы бик күп

Бәрәңгене сукыр тычканнан саклау өчен, утыртканда, чокырына йомырка кабыгын (эре кисәкләргә таркатып) салып калдыралар. Кәбестә түтәленә сипкәндә, лайлачлар юкка чыгачак. Аю-чикерткәдән дә котылу чарасы ул.

Йомырка кабыгын карбыз, кавын, баклажан, борыч һәм чөгендер дә ярата. Аларның үсүе өчен микроэлементлар бик күп кирәк чөнки. Бу яшелчәләрне утыртканда, кабыкны, ваклап, чокырына сибәләр.

Туфракта кальций җитмәсә, помидор (үсентесе түгел, яшелчә үзе) төбеннән чери башлый. “Вершинная гниль” дигән чир бу. Аннан котылу өчен үсенте төбенә йомырка кабыгын ваклап сибәргә кирәк. Бераздан чир чигенәчәк.

Чәчәк кәбестә дә йомырка кабыгын ярата. Шуңа күрә, утыртканда, чокырына, кальций, ягъни йомырка кабыгы салып калдырырга кирәк.

Тәрәзә төбендәге үсентеләрдә “караяк” чире (сабакның түбәнге өлеше карала) булмасын өчен туфрак өстенә йомырка кабыгын ваклап сибү файдалы.

©vatantat. ru