Өрекле-эремчекле пирог рецепты

Ал төс өчен, эремчектән ясалган эчлеккә азык-төлек буявы кушарга мөмкин.

Камыр өчен: 100 грамм атланмай (бүлмә температурасында йомшарган), 100-150 грамм шикәр комы, 1 йомырка, 1 аш кашыгы майонез, 1 бал кашыгы аш серкәсе белән сүндерелгән сода, 200-250 грамм он.

Барысын бергә кушып камыр басарга. Камыр кулга ябышмаска тиеш. Табага кул белән җәяргә.

Беренче эчлек өчен: иттарткычтан чыгарылган 300 грамм өрек җимеше. Куе булмасын өчен, әз генә кайнаган су кушарга һәм тәменчә шикәр комы салырга. Эчлекне табага җәелгән камыр өстенә салырга.

Икенче эчлек өчен: 200-300 грамм эремчек, 5-6 йомырка, 150-200 грамм шикәр комы. Барысын бергә яхшылап болгатырга һәм өрек эчлеге өстенә салырга.

Пирогны 150-180 градуска кадәр кызган мичтә 1-1,5 сәгать пешерергә.

Чыганак: ИНТЕРТАТ