Арча районында бадминтон ярышлары старт алды

Арча районында бадминтон спорты үсеш ала. Яз башында Арча спорт комплексында бадминтон буенча район ярышлары старт алды. Чарага 2015 елгы һәм аннан кечерәк яшьтәге малайлар һәм кызлар җыелды. Ярышларда район мәктәпләрендә шөгыльләнүче яшь спортчылар катнаша.

Тантаналы ачылышта Арча районы яшьләр эшләре, спорт һәм туризм бүлеге җитәкчесе Фәнил Хидиятуллин чыгыш ясады. Ул районда бадминтон өчен кирәкле шартлар тудырылуын билгеләп үтте.

— Арча районында яшь спортчыларга бадминтон белән шөгыльләнү өчен барлык мөмкинлекләр дә бар. Әлеге спорт төренә игътибар арта. Безгә Татарстан Республикасы Бадминтон федерациясе дә ярдәм күрсәтә, шуңа күрә киләчәктә ярышлар саны тагын да артачак, — диде ул.

Рәсми өлештән соң Россия Федерациясе һәм Татарстан Республикасы гимннары яңгырады. Аннан соң судьялар катнашучыларга иминлек кагыйдәләрен аңлатты.

Ярышлар дүрт мәйданчыкта узды. Беренче булып 2015 елгы һәм аннан кечерәк яшьтәге спортчылар көч сынашты. Уеннар башлану белән спорт залы актив хәрәкәткә күмелде.

Баш судья Динара Хакимова сүзләренә караганда, бадминтон — тизлек һәм тактик фикерләү таләп иткән спорт төре.

— Бадминтонда волан зур тизлектә оча. Спортчыга тиз реакция күрсәтергә һәм уен барышын алдан уйларга кирәк, — диде ул.

Яшь спортчылар уен вакытында җитезлек, игътибарлылык һәм чыдамлык күрсәтте. Катнашучылар арасында көндәшлек көчле булды, уеннар актив һәм киеренке узды.

Ярышлар нәтиҗәләре буенча җиңүчеләр һәм призерлар билгеләнде. Алар дипломнар һәм истәлекле бүләкләр белән бүләкләнде.

Командалар арасында беренче урынны  Хәсәншәех мәктәбе яулады. Икенче урында — Апаз мәктәбе, өченче урынны Арча укучылар сарае командасы алды.

Арча районында бадминтон буенча ярышлар ел дәвамында үткәреләчәк. Район яшьләрен спортка җәлеп итү һәм сәламәт яшәү рәвешен популярлаштыру эшләре дәвам итә. 

Җиңүче командалар:

1 урын – Хәсәншәех мәктәбе
2 урын – Апаз мәктәбе
3 урын – Арча Укучылар сарае