Арча яңалыклары
Арча укучылар сараеның иҗат-хисап концерты узды
Өстәмә белем бирү оешмасы 2023-2024 елгы уку елына нәтиҗә ясады
23 май көнне район мәдәният йортында Арча укучылар сараеның иҗат-хисап концерты узды. Бәйрәмгә килгән тамашачыларны, катнашучыларны ишек төбеннән үк курчак театры түгәрәге әзерләгән күренеш һәм кул эшләнмәләре күргәзмәсе каршы алды.
Иҗади чарада район башкама комитеты җитәкчесе урынбасары Эльвира Вафина, мәгариф идарәсе җитәкчесе урынбасары Ләйсән Галимова да катнашты.
– Районның бер чарасыннан да читтә калмаучы Арча укучылар сарае коллективына зур рәхмәтләремне җиткерәм. Алар иң креатив, иң булган, уңган командаларның берсе. Шулай ук зур рәхмәтем биредә утыручы әти-әниләргә, әби-бабайларга. Вакытыгызны, мөмкинлегегезне тавып, балаларны түгәрәкләргә йөрткәнегез, төрле чаралардан читтә калмавыгыз өчен рәхмәт. Укучылар сараенда хезмәт куючы педагоглар белән сокланам. Алар бервакытта да картаймаслар, чөнки балаларга бөтен күңелләрен биреп эшлиләр, – дип сәламләде Эльвира Вафина.
Берсеннән-берсе матур, эчтәлекле чыгышлар бүләкләү һәм котлау сүзләре белән үрелеп барды. Укучылар сараена биш ел йөрүче балалар кулларына чыгарылыш документлары алса, алдынгы укучылар район мәгариф идарәсенең дипломнары белән бүләкләнде.
Следите за самым важным и интересным в Telegram-каналеТатмедиа
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев