28 сентябрьдә Арча шәһәрендә юл-транспорт һәлакәте теркәлгән. 1995 елда туган хатын-кыз, автомобиль белән идарә иткәндә, җәяүлегә бәрелгән.
Һәлакәт урынында автомобиль йөртүче зыян күрүчегә ярдәм күрсәткән. Яклар бер-берсенә дәгъвалары юклыгына инангач, юл-транспорт һәлакәтен рәсми рәвештә теркәтмәскә һәм ЮХИДИ хезмәткәрләрен чакыртмаска карар иткән. Шуннан соң автомобиль йөртүче вакыйга урыныннан киткән.
Бер сәгать чамасы вакыт үткәч, зыян күрүче аякларында авырту һәм хәле начарлануын сизгән. Ул «Арча үзәк район хастаханәсе»нә һәм Россия Эчке эшләр министрлыгының Арча районы буенча бүлегенә мөрәҗәгать иткән. Хәзерге вакытта әлеге факт буенча тикшерү үткәрелә.
Полиция кисәтә
Россия Эчке эшләр министрлыгының Арча районы буенча бүлеге искәртә: зыян күрүче булган юл-транспорт һәлакәте вакытында, вакыйга урынында дәгъва булмаса да, ЮХИДИ хезмәткәрләрен чакырмау дөрес түгел. Кайбер җәрәхәтләр һәм авырту билгеләре һәлакәттән соң берникадәр вакыт үткәч кенә барлыкка килергә мөмкин. Юл-транспорт һәлакәтен рәсми рәвештә теркәтмичә, зыян күрүче иминият түләве яки компенсация алу мөмкинлегеннән мәхрүм калырга мөмкин.
Моннан тыш, автомобиль йөртүче юл-транспорт һәлакәте урынын калдырып киткән өчен Россия Федерациясе Административ хокук бозулар кодексының 12.27 маддәсе нигезендә җаваплылыкка тартылырга мөмкин. Җәза транспорт чарасы белән идарә итү хокукыннан мәхрүм итүгә кадәр җитә ала.
Нет комментариев