Балаларны яклау көне уңаеннан Арчада бәйрәм чаралары узды

Бәйрәм чаралары көндезге 10нан башланып китте. Район мәдәният йорты хезмәткәрләре тарафыннан Арчаның өч мәйданчыгында күңелле уеннар оештырылды. Көнбатыш, Көнчыгыш һәм Зәйнуллина урамнарындагы уен мәйданчыкларында мәдәни күңел ачу чаралары узды. Сабантуй уеннары, дини биремнәр һәм конөерт номерлары белән үрелеп барды. Балалар белән уйнаучы әкият герое Шүрәлене сабыйлар бик яратты. Аның белән рәхәтләнеп биеп, фотоларга төштеләр.

Шулай ук район үзәк хастахәнәсе ишегалдында да биредә дәваланучы балалар өчен бәйрәм узды. Район балалар китапханәсе хезмәткәрләре биредәге балаларга күңелле уеннар уйнатып, күңелле мизгелләр бүләк итте.

Бәйрәмнең иң зур чарасы Җиңү паркында үтте. Арча укучылар сарае һәм "Ак чәчәкләр" волонтерлар оешмасы тарафыннан тантаналы хәйрия бәйрәме оештырылган иде. Паркка керүгә һәркемне хәйрия ярминкәсе каршы алды. Кул эшләнмәләре һәм тәмле ризыклар, балалар өчен уен мәйданчыклары - бары да сәламәтлекләре ягыннан мөмкинлекләре чикле балалар өчен ярдәм йөзеннән оешырылган иде. Шулай ук бәйрәм сәхнәсендә лотерея да уйнатылды. Арчадагы төрле сату нокталары, матурлык салоннары үзләренең сертификатларын тәкъдим иттеләр. Оештыручылар бәйрәмнән җыелган акчалар "Өмет чаткысы" тернәкләндерү үзәгенә биреләчәген әйтте. 

Шулай ук мастер-класслар һәм спорт уеннары да бирегә җыелган балалар өчен мавыктыргыч мизгелләр бүләк итте. Бәйрәм сәхнәсендә "Мин Арча баласы" проектының төрле юнәлешләрендә җиңү яулаучы укучылар бүләкләнде. Балалар бию коллективлары, үзешчән җырчылар һәм татар эстрадасы артистлары бәйрәмнең бизәге иде. 

 Фотолар https://vk.com/arskdvorec,  https://vk.com/id345268721, https://vk.com/arskkulture төркемнәреннән алынды.