«Башваткыч» уены уздырдык

Арчаның “Өмет чаткысы”  балаларны тернәкләндерү  үзәгендә «Башваткыч» дигән мавыктыргыч интеллектуаль уен уздырдык. Башваткыч-кроссвордларны чишәргә яратучылар өчен интеллектуаль викторина уен татар халык әкиятләренә багышланган иде. Уенда өч уенчы катнашты, алар сорауларга җавап бирделәр, хәрефләр әйттеләр һәм кроссворд чиштеләр. Уен башында катнашучылар үзләренең визит карточкаларын һәм иҗади номерларын күрсәттеләр.  Чара барышында балалар алып баручының сорауларына җавап биреп кенә калмадылар, турлар арасындагы тәнәфесләрдә дә үзләренең талантларын күрсәттеләр, шигырьләр укыдылар, җырлар һәм биюләр башкардылар. Тамашачылар да актив катнашты, алар өчен сораулар һәм кызыксындыру призлары әзерләнде. Уен барышында балалар татар халык әкиятләре, татар язучылары белән таныштылар. Иң күп бал җыйган  җиңүчегә истәлекле бүләк бирелде, калган катнашучыларга да  призлар бирелде. Мондый интеллектуаль уеннар логиканы, күзаллау, коммуникатив күнекмәләрне үстерә, иҗади потенциалны чагылдырырга ярдәм итә, ә иң мөһиме – яхшы кәеф тудыра

Уеннарны татар телендә уздыру халкыбызның мәдәниятен аңларга ярдәм итә, аралашу күльтурасын, толерантлык,  үзеңнең һәм башка милләт йолаларына хөрмәт тәрбияли.

Гүзәлия Вәлиева,

социаль педагог.