Бу хатны укымыйча калмагыз!

Бу хатны укымый калмагыз!

Исәнме, Арча!

Сезгә Мамадыш районы Акташ авылыннан Рифат Имаметдинов яза. Армиядә булганыма 50 ел вакыт үткән. Мин армиядә хезмәт иткәндә “Татарстанда иң яхшы егетләр Арчада икән”, – дигән фикергә килдем. Бик яхшы егетләр, мәңге оныта торган түгел. Без Казахстанда хезмәт иттек. Үзем 1949 елгы. Иптәшләрем дә минем яшьтә иделәр.

Мансур Хөснетдиновны исән диеп беләм. Мөхәммәт Миңнуллин пешекче иде. Миңа ашарга төнлә белән дә алып килеп бирә иде. Наил Рахманов бик оста гармунчы, композитор. Ул армиядән кайткач үлде. Эт талап үтергән, диделәр. Мамадыштан Марсель Хәсәншин шулай ук мәрхүм булды, армиядән кайткач, өстенә агач төште.

Арчадан Шамил Хәбибуллин армиядән кайтыр вакыт җиткәч, Казахстанда бакыйлыкка күчте. Озатырга әтисе килгән иде. Ул үлеменең сәбәбен язып калдырган. Башкорт малае белән сүзгә килгәннәр. Кайтырга ике ай гына калган иде.

Мин Арча егетләре белән бик дус булдым. Хезмәттәшләрем, исән булсагыз, миңа җавап бирерсез диеп, ышанып калам. Телефоным: 88556329308. Рифат Имаметдинов. Мамадыш-Акташ. Редакциядән: Хөрмәтле сайтны укучылар, бу хатны игътибар белән укып чыгыгыз. Исән-сау булганнар дәшми калмагыз. Бәлки хатта язылганнарның туганнары, танышлары булыр. Мәрхүм булсалар да, алар турында да яза аласыз. Рифат абый гына түгел, без дә шалтыратулар, хатлар көтәбез! Языгыз, шалтыратыгыз! Редакция телефоны: 3-11-58