Яңа Кенәр интернат-мәктәбендә тәрбияләнүчеләр Тукай әкиятләрен тәкъдим иттеләр

Бу көнне мәктәптә халык шагыйренең җанлы әкиятләре һәм шигырьләре яңгырады. «Шүрәле», «Су анасы», «Кызыклы шәкерт» һ.б. әсәрләрен сәхнәдә ихлас күңелдән, эчкерсезлек белән гәүдәләндергән яшь артистларны тамашачылар сокланып күзәттеләр. Бәйрәмне оештыручылар – интернат-мәктәп тәрбиячеләре, укытучылары һәм тәрбия эше буенча директор урынбасары Илсия Мөхәммәдиева.

«Мәктәбебездә апрель ае дәвамында Габдулла Тукай иҗатына багышланган чаралар күп булды. Шагыйрь әсәрләрен сәхнәләштерү буенча фестиваль уздырдык. Андагы һәр чыгыш аерым мактауга лаек иде. Һәм без бу чыгышларны бергә туплап, яңа сценарий төзедек һәм бик матур тамаша килеп чыкты», – диде интернат-мәктәпнең татар теле һәм әдәбияты укытучысы Рания Шакирова.

Күп кенә балалар өчен бу чыгышлар чын җиңү булды: кемдер сәхнәгә беренче мәртәбә кыю атлап, озын монолог сөйләде, кемдер сүзсез, бары тик хәрәкәтләр һәм тәэсирле карашлар ярдәмендә генә үз героеның характерын җиткерә алды, ә кемдер, кыюсызлыгын җиңеп, горурланып, Тукай шигырьләрен укыды. 

Чарага мәртәбәле кунаклар да килгән иде. Аларның ярдәме һәм игътибары яшь артистлар өчен бәяләп бетергесез бүләк булды. Оештыручылар, интернат-мәктәп укытучылары кунакларга җылы сүзләре өчен ихлас рәхмәтләрен белдерәләр.

Мәктәптә шулай ук Тукай иҗатын яктыркан рәсем һәм кул эшләнмәләре күргәзмәсе булдырылган.