Яшь тилгәнне коткардык

Татарстан Республикасы Биологик ресурслар дәүләт комитетының Арча районындагы бүлек җитәкчесе Булат Шәйхуллин шалтыратты.

"Казан юлында бер имгәнгән кошны алып кайталар, вакытың булса, килеп кит", - диде. 

Менә ул егетләр кайтып та җитте. Кошны зур тартмага салып алып кайтканнар. Аның яныннан күпме машина узгандыр инде, ә болар тыныч кына үтеп китә алмаган, яшь тилгән баласы булып чыкты ул. Нәкъ олы кош кебек инде. Канаган, сынган урыннары юк, ветеринарлар ярдәме кирәк түгел. Бәрелеп, шок алган булса кирәк.

Егетләр безгә кошны кабул итеп алганга рәхмәт әйтеп китеп бардылар, без аларга рәхмәт әйтеп калдык. Булат белән яшь тилгәнне Казансу елгасы буендагы талларга җибәрдек.