"Ирем җәберли! Туктатыгыз үзизоляция режимын!"

автор, 6 май 2020 - 09:11

1538

Соңгы айда ире ягыннан физик көч кулланудан интегүче хатын-кызлар 2,5 тапкыр артты.

"Ирем җәберли! Туктатыгыз үзизоляция режимын!"

Россиядә үзизоляция режимы нәтиҗәсендә өйдә көч куллану очраклары саны арткан. Бу хакта хатын-кызлар өчен кризис үзәкләре мәгълүматлары сөйли.

Россиядә Кеше хокуклары буенча вәкил Татьяна Москалькова өйләрендә төрле физик көч куллануга дучар булучыларга өйдән пропусксыз чыгарга рөхсәт бирергә тәкъдим итте. Физик көч куллануга дучар булган хатын-кызлар үзизоляция режимы белән бәйле рәвештә гариза бирү өчен тиешле оешмаларга мөрәҗәгать итә алмый. Шулай ук алар моңа бәйле үзәкләргә дә мөрәҗәгать итә алмый. Бу хатын-кызларга коткару үзәкләренә бару өчен өйдән чыгарга рөхсәт бирүгә зур сәбәп булып тора. Бу үзизоляцияне бозу дип саналырга тиеш түгел, дип саный Татьяна Москалькова.

Үзизоляция режимы кертелгәч, төрлечә көч куллану корбаннарының мөрәҗәгатьләре саны 2,5 тапкыр арткан. Билгеле булуынча, гаджетлар һәрвакытта да куллануда уңайлы түгел, чөнки корбаны, гадәттә, көч кулланучы ягыннан җавап реакциясе булачагын аңлап, шалтыратудан курка.