Юлда сак булу – һәркемнең җаваплылыгы

Көз җитү белән көннәр кыскара, караңгы вакыт арта. Мондый шартларда юл хәрәкәтендә катнашучыларга аеруча игътибарлы булырга кирәк. Җәяүлеләр  өчен юл-транспорт һәлакәтләрен кисәтүдә яктылык кайтаргыч элементлар куллануның әһәмияте дә арта.  Рөстәм Хәкимов белән дә без нәкъ менә шул хакта сөйләштек.

• Рөстәм Рәфкатович, көзге чорда җәяүлеләр катнашындагы юл-транспорт һәлакәтләрен кисәтү өчен аеруча нәрсәгә игътибар итәргә кирәк?
• Көз һәм кыш айларында көн яктысы шактый кыскара. Иртән кешеләр эшкә, укуга барганда һәм кичен өйләренә кайтканда күп очракта караңгы вакытка туры килә. Яңгыр, томан, кар, юл өслегенең дымлы булуы да машина йөртүчеләрнең күрү мөмкинлеген киметә. Шуңа күрә җәяүлеләргә юл аша чыкканда аеруча игътибарлы булырга, юл хәрәкәте кагыйдәләрен төгәл үтәргә кирәк. Ә машина йөртүчеләргә торак пунктларда, җәяүлеләр күп йөри торган урыннарда тизлек режимын саклау һәм юлдагы хәлгә һәрвакыт әзер булу мөһим.
• Җәяүлеләр өчен яктылык кайтаргыч элементларның әһәмияте нидән гыйбарәт?
• Яктылык кайтаргыч элементлар – җәяүленең юлда күренү мөмкинлеген арттыручы мөһим чара. Машина фаралары яктыртканда, мондый элементлар яктылыкны кире кайтара һәм йөртүчегә җәяүлене ерактанрак күрергә мөмкинлек бирә. Гади генә әйбер – киемдәге кечкенә яктылык кайтаргыч тасма, беләзек, брелок яки башка элемент – караңгы вакытта кеше куркынычсызлыгын арттырырга мөмкин.
• Әлеге киңәш бигрәк тә балаларга кагыладыр?
• Әлбәттә. Балалар юлдагы куркынычларны һәрвакыт тиешенчә бәяли алмый. Шуңа әти-әниләр балаларга юл хәрәкәте кагыйдәләрен даими искә төшерергә, караңгы вакытта киемнәрендә яктылык кайтаргыч элементлар булуына игътибар итәргә тиеш. Балага "юлны тиешле урында гына чыгарга", "светофор сигналларына игътибар итәргә", "юл кырыеннан барганда телефонга карамаска" кебек гади кагыйдәләрне аңлату бик мөһим.
• Машина йөртүчеләргә нинди киңәшләр бирер идегез?
• Иң беренче чиратта – тизлек режимын сакларга һәм юл шартларына карап тизлекне киметергә. Җәяүлеләр кичүе алдыннан аеруча игътибарлы булырга кирәк. Көзге караңгыда юл читендә яки җәяүлеләр кичүендә кешене күрми калу куркынычы арта. Шулай ук рульдә булганда телефоннан файдаланмау, игътибарны читкә юнәлтмәү, куркынычсыз дистанция саклау мөһим.
• Җәяүлеләргә мөрәҗәгатегез нинди?
• Хөрмәтле райондашлар! Юлдагы куркынычсызлык – барыбызга да кагыла торган мәсьәлә. Үзебезнең дә, якыннарыбызның да иминлеге юл хәрәкәте кагыйдәләрен үтәүгә бәйле. Караңгы вакытта юлга чыкканда ачык төстәге киемнәргә өстенлек бирегез, мөмкин булганча яктылык кайтаргыч элементлар кулланыгыз. Юлны бары тик рөхсәт ителгән урыннардан гына аркылып чыгыгыз һәм светофор сигналларына игътибар итегез. Юлда һәркемнең бер генә максаты булырга тиеш – исән-имин өйгә кайту. Үзебезне дә, бер-беребезне дә саклыйк!