13 гыйнвардан 6 мартка кадәр республикада “Кар чанасы – 2020” профилактик операциясе үткәрелә. Максаты – техниканың техник хәлен, хәрәкәт куркынычсызлыгын контрольдә тоту, тирә-як мохитне, юлларны саклау. Операция барышында Татарстан Республикасының дәүләт техник күзәтчелеге идарәсе ЮХИДИ, гадәттән тыш хәлләр, аучылык хезмәтләре белән берлектә рейдлар оештырачак. Рейдлар барышында кар чаналарының дәүләт теркәлү билгеләренә, машиналарның теркәлү мәгълүматларына туры килүенә, вакытында техник күзәтү үткәрелүенә, йөртүчесенең тиешле категория белән таныклыгы булуына игътибар итәчәкләр. Машиналарны теркәү, техник күзәтү үткәрү, техник яктан төзек булмаган машина белән идарә итәргә рөхсәт бирүдә кагыйдәләр бозылган очракта Административ хокук бозулар кодексы нигезендә чара күреләчәк. Бу хакта безгә Арча районы буенча бүлек җитәкчесе, баш дәүләт инженер-инспекторы Габделхак Касыймов хәбәр итте.