Коронавирус бетәр, ә эшсез калучылар нишләр?

- Хатынымның туганы Казанда бер дәрәҗәле кибетләр челтәрендә эшли. Үзизоляция башлангач, җитәкчелек: "Түләргә акча юк", - дип өйләренә кайтарып җибәргән. Казанда күптән түгел ипотекага фатир алганар иде. шуны түлиләр. Аны ничек түләргә, яшәр өчен каян акча табарга хәзер? Әле үзизоляция беткәч тә, ул эшләгән ширкәт эшчәнлеген элеккечә дәвам итеп, хезмәткәрләренә акча түли алырмы? Үземнең энемнең дә хәлләре мөшкел. Ул Казанда үзмәшгуль булып теркәлеп, өендә пешереп, Казанның төрле оешмаларына заказ буенча әбәт таратып йөри иде, 70 ләп клиенты бар иде. Хәзер оешмалар эшләмәгәч, аның да эшчәнлеге тукталды. Ул да йорты, машинасы өчен кредит түли... Эшсез калып, өйдә утырырга мәҗбүр булган, кредитлары булган кешеләр нишләргә тиеш хәзер?

Мондый аяныч хәлдә калучылар бик күп шул... Вакытлыча ябылган оешмалар эшчәнлеген дәвам итә алса ярый да...

Халык арасында, без хәзер элеккеге рәвештә яши, эшли алмабыз, хәтта тарихи борылыш булуы ихтимал дигән фаразлар да бар.

Шушы проблемаларны күздә тотып ил җитәкчелеге эшсез калучылар, кредитларын түли алмаучылар һәм авыр хәлдә калган эшмәкәрләргә төрле ярдәм чаралары игълан итте. Алар белән без сезне таныштырып баруыбызны дәвам итәчәкбез. Газетабыздагы киләсе шундый язмабыз кече һәм урта эшмәкәрләргә багышланачак."Арча хәбәрләре"нә язылырга онытмагыз,әле 30 апрельгә кадәр ташламалы бәядән язылып була.