Кыш килсә, тунын кияр иде

Быел гомер итек кимәгән ирем Кукмарага барган җиреннән 2500 сумга яхшы итеп эшләнгән итек алып кайтты. Шкафта тора инде. "Син генә кышны куркыттың", - дибез аңа шаярып. Нәрсәдән чыкты бу сүз? Эштән төшке ашка кайтышлый, элеккеге "Эссен" кибете янында күп итек итекләр сатып торалар. Тирә-юнендә кар әсәре юк, урыны-урыны белән чыпырдатып суга басасың - машина өстендә, алдында, янындагы өстәлдә итекләр. "Бик сыйфатлы итеп эшләнгән, алыгыз", - ди кибетчесе. Көлеп китек бардык. Безгә көлке, ә менә шуның белән көн күрүчеләр өчен кышның җылы килүе бер дә файдага түгел. 

Дус кызым Төркиядән 180 мең сумга кредитка чәшке тун алып кайтты. Мескен, шуны кия алмый тилмерә инде. Беркөн киеп барган иде, итәген пычракка буяп кайткан. Итек итек инде, матур туннарын да күрсәтә алмыйлар бит әле.