Татарстанда юл-транспорт һәлакәтләре саны азайган, ә шушы һәлакәтләрдә үлүчеләр арткан

Бу хакта бүген Алабугада узган юл тминлеген тәэмин итү буенча хөкүмәт комиссиясенең күчмә киңәшмәсендә Татарстан буенча Эчке эшләр министрлыгы идарәсе җитәкчесе вазифаларын башкаручы Айрат Сәмигуллин сөйләде. Киңәшмә Татарстан Премьер-министры урынбасары – Татарстан Министрлар Кабинеты аппараты җитәкчесе, Юл хәрәкәте иминлеген тәэмин итү буенча Татарстан Хөкүмәте комиссиясе рәисе урынбасары Шамил Гаффаров җитәкчелегендә узды.

«Быелның алты ае йомгакларына игътибар итсәк, юл-транспорт һәлакәтләре һәм имгәнүчеләр саны кимегән, һәлак булучылар саны арткан», – дип сөйләде Айрат Сәмигуллин. Бу хәл  борчу тудыра.

Юл-транспорт һәлакәтләрендә үлем очраклары еш кына автомобильләр бәрелешүе һәм җәяүлеләрне бәрдерү аркасында килеп чыга. 

Быелның беренче алты аенда автомобильләр бәрелешүе аркасында 86 кеше, ә җәяүлеләрне бәрдерүдә 22 кеше үлгән. Ә 38 кеше автомобильләрнең юлдан читкә төшүе, юлдагы киртә-каршылыкларга бәрелүе аркасында һәлак булган. Утырышта юл иминлеге кагыйдәләрен саклау, юл сыйфатын яхшырту турында җитди сөйләшенде.