Арча үз укытучылары белән горурлана!

80 ел – хезмәт, иҗат һәм үз эшенә тугрылык белән сугарылган бер гомер дәвере.
Алевтина Ивановна Арчада туган. 1963 елда Арчаның 1нче урта мәктәбен тәмамлап, Казан педагогия институтының математика факультетына укырга керә. Институтны тәмамлагач, биш ел дәвамында Төбәк-Чокырча сигезьеллык мәктәбендә математика укытучысы булып эшли, ә 1972 елдан Арчаның 2нче урта мәктәбендә педагогик эшен дәвам итә.

Күп еллар дәвамында Алевтина Ивановна укучыларын математика дөньясын өйрәнергә илһамландырды, саннар һәм формулалар серен ачарга ярдәм итте. Аның дәресләре һәрвакыт мавыктыргыч мисаллар һәм тормыштан алынган кызыклы хәлләр белән тулы, шуңа күрә аның дәресләре мавыктыргыч иде.
Төрле еллардагы укучылары Алевтина Ивановнаны рәхмәт белән искә ала. 1988 елгы чыгарылыш укучысы Алла Малафеевская: “Алевтина Ивановна иң катлаулы әйберләрне дә гади һәм аңлаешлы итеп аңлата белә иде, – дип сөйли. – Ул безгә математика фәнен гади генә итеп аңлата белде,  уйларга, анализ ясарга, мәсьәлә, мисаллар чишүдә гадәти булмаган юллар табарга өйрәтте. Шуңа да мин математиканы аңладым һәм яраттым“. Ул еш кына Михаил Ломоносов сүзләрен кабатларга ярата иде: “Математиканы өйрәнергә кирәк, чөнки ул акылны тәртипкә китерә“.

1999 елгы чыгарылыш укучысы Ләйсән Миннебаева сыйныф җитәкчесе буларак укытучысын җылы хисләр белән искә ала: “Алевтина Ивановна бик таләпчән иде, ләкин гадел дә. Класс сәгатьләрендә без аның белән төрле темаларга сөйләшә ала идек, ул һәр соравыбызга җавап таба иде. Теманы авыр үзләштерүчеләр белән ул аерым шөгыльләнде. Ата-аналар җыелышында ул безнең уңышларны билгеләп үтә иде, ә җитешсезлекләр турында һәрберебез белән аерым сөйләшә. Хәзер аңлыйм – бик зирәк педагог булган ул. Әнием хастаханәдә яткан чакта ул әни янына хәл белергә барды, күчтәнәчләр алып килде. Мин моның өчен аңа бик рәхмәтле. Бу игелек дәресләре күңелемдә мәңге сакланыр“.

Алевтина Ивановнаның педагогик эшчәнлегенең күп еллары Арчаның 2нче урта мәктәбендә узган. Хезмәттәшләре аны намуслы, әдәпле, фәнне тирән белүче, югары һөнәри осталыкка ия педагог булуын билгеләп үтә. Алевтина Ивановна үз фәненә тугрылыгын гомере буе саклады һәм күп кенә яшь укытучылар өчен акыллы остаз булды.

Күпьеллык намуслы хезмәте өчен хөрмәтле укытучы “Мактау билгесе” ордены белән бүләкләнгән, “Педагогик хезмәт ветераны” исемен горур йөртә.
Алевтина Ивановна, сезне юбилеегыз белән котлыйбыз! Сезгә бәхет, нык сәламәтлек һәм озын гомер телибез!

Район мәгариф идарәсе