Казанда махсус хәрби операциядә һәлак булган хәрбинең кызы 7 миллион сум акчасын югалткан

Казанда яшәүче хатын-кыз, махсус хәрби операциядә һәлак булган әтисенә бәйле түләүләрне алганнан соң, мошенниклар корбаны булган. Җинаятьчеләр аны төрле юллар белән алдап, гомумән алганда 7 миллион сум акчасын үзләштергән. Бу хакта «Татар-информ» агентлыгына Татарстан Республикасы Эчке эшләр министрлыгының киберҗинаятьләргә каршы көрәш бүлеге оперуполномоченные Рәдис Йосыпов хәбәр иткән.

Әлеге хәл узган елның декабрь аенда теркәлгән. Мәгълүматларга караганда, зыян күрүче 6 миллион сум акчаны мошенниклар җибәргән курьерга тапшырган, тагын 1 миллион сумны банкоматлар аша алар күрсәткән исәп-хисап счетларына күчергән.

Хокук саклау органнары вәкилләре аңлатуынча, соңгы вакытта җинаятьчеләр махсус хәрби операциядә катнашучыларның гаиләләренә игътибарын юнәлтә. Алар Оборона министрлыгы тарафыннан бирелә торган түләүләр турында мәгълүмат туплый һәм кешеләрне социаль челтәрләрдәге тематик төркемнәргә җәлеп итә.

«Мошенниклар СВО белән бәйле чатлар һәм төркемнәр аша элемтәгә керә, фишинг сайтларга сылтамалар тарата. Мондый сылтамаларга керү телефонга зарарлы программа урнашуга китерергә мөмкин», – дип аңлата Рәдис Йосыпов.

Моннан тыш, киң таралган алымнарның берсе – телефон аша психологик басым ясау. Башта кечерәк сумма сорап алалар, аннары үзләрен тикшерүче яки хокук саклау органы хезмәткәре итеп таныштырган кешеләр шалтыратып, янәсе, акчалар тыелган оешмалар счетына күчерелгән дип хәбәр итә.

«Гадәттә, сөйләшү хәрбинең туганнары белән бара. Мошенниклар кешене, җинаять җаваплылыгыннан котылу өчен, “чын мошенникларны тоту буенча махсус операциядә” катнашырга күндерә», – ди ул.

Хокук саклау органнары гражданнарны уяу булырга чакыра һәм шикле очракларда кичекмәстән полициягә мөрәҗәгать итәргә киңәш итә.