Казанда Россия һәм Белоруссия халыклары берләшү көненә багышланган концерт узды

Казанда Халыклар дуслыгы йортында Россия һәм Беларуссия халыклары бердәмлеге көненә багышланган тантаналы концерт узды. Чарада Татарстаннан һәм Беларуссиядән иҗат коллективлары катнашып, уртак мәдәни киңлекнең байлыгын күрсәттеләр, дип хәбәр итә “Татар-информ”.

Бәйрәм кысаларында Беларуссия Республикасы Хөкүмәте исеменнән вице-премьер Виктор Каранкевич чыгыш ясады. Республика дәрәҗәсендәге хезмәттәшлекнең мөһимлеген ассызыклап, чыгышта союз мөнәсәбәтләренең төрле сынаулар аша узуы һәм үзенең тотрыклылыгын раславы турында  әйтелде. Шулай ук төбәкләр, министрлыклар һәм хуҗалык субъектлары арасындагы турыдан-туры элемтәләрнең үсешкә этәргеч бирүе билгеләнде.

Үз чиратында, Татарстан Республикасының сәнәгать һәм сәүдә министры Олег Коробченко ике як арасындагы хезмәттәшлекнең киң колач алуын искәртте. Аның сүзләренчә, мәдәният, спорт, сәнәгать һәм авыл хуҗалыгы өлкәләрендә уртак проектлар нәтиҗәле гамәлгә ашырыла, һәм бу элемтәләр елдан-ел ныгый бара.

Чара барышында концерт программасы белән беррәттән, күргәзмә дә тәкъдим ителде. «Я тут бачу свой край» дип исемләнгән экспозиция Янка Купала музее фондларыннан тупланган. Ул бөек шагыйрьнең Беларуссиядән Казанга килү юлын, шулай ук Печищи авылында тукталуын тасвирлый. Бүген әлеге урында Россиядәге бердәнбер Янка Купала музее эшләп килә.

Күргәзмәдә шулай ук төрле халыкларның мәдәни уртаклыгын күрсәтүче экспонатлар урын алган. Аерым алганда, татар, рус һәм белорус халыкларына хас чигелгән сөлгеләр бер витринада тәкъдим ителеп, традицияләрнең охшашлыгын һәм рухи бәйләнешләрне чагылдыра.